त्रिवेणी गाउँपालिका कर्णाली प्रदेश अन्तर्गत सल्यान जिल्लाका साविकका काभ्रा, काँरागिठी, फलाबाब र त्रिवेणी गरी ४ ओटा गा.वि.स.लाई समावेश गरी स्थापना भएको हो । शारदा खोला, लुहाम खोला र घुर खोलाको संगम स्थल भएकालेनै यस नाउँ त्रिवेणी गाउँपालिका रहन गएको हो । यस गाउँपालिकाको कुल क्षेत्रफल जम्मा ११९.११ वर्ग कि.मि रहेको छ । यस गाउँपालिकाको पूर्वमा कपुरकोट गाउँपालिका, पश्चिममा कालिमाटी गाउँपालिका उत्तरमा शारदा नगरपालिका र छत्रेश्वरी गाउँपालिका र दक्षिणमा दाब जिल्ला पर्दछ । त्रिवेणी गाउँपालिका विश्व मानचित्रमा २८० १४ ं देखि २८० २०ं उत्तरी आक्षांश र ८२० ०८ं देखि ८२० २०ं पूर्वी देशान्तरसम्म फैलिएर रहेको छ भने समुद्री सतहबाट ७८३ देखि २,१०७ मिटरसम्मको उचाइमा अवस्थित छ । सल्यान जिल्लामा नयाँ गठन भएका गाउँपालिकाहरु मध्ये त्रिवेणी गाउँपालिका विकासको राम्रो सम्भावना बोकेको गाउँपालिका हुनुका साथसाथै यहाँका सचेत राजनैतिक दल र उत्प्रेरित गाउँवासी यो गाउँपालिकाका दरिलो अनि दीगो विकासका श्रोत हुन् । २०७८ को जनगणना अनुसार यस गाउँपालिकाको जनसंख्या १६६६४ रहेको छ जस मध्ये महिलाको जनसंख्या ८७४६ (५२.५५) र पुरुषको जनसंख्या ७९१८ (४७.५५) रहेको छ । लैङ्गिक अनुपात ९०.५३ पुरुष प्रतिसय महिलामा रहेको तथ्यले देखाउछ । त्रिवेणी गाउँपालिकाको कुल जनघन्त्व १४० जना प्रति वर्ग किलोमिटर रहेको छ । जम्मा ४११० परिवार संख्या रहेको यस त्रिवेणी गाउँपालिकाको कुल साक्षरता दर ७६.९ प्रतिशत रहेको छ । जसमध्ये पुरुष साक्षरता दर (८३.९) प्रतिशत र महिला साक्षरता दर (७०.७) प्रतिशत रहेको छ । वडागत रुपमा हेर्दा वडा नं. १ मा कुल जनसंख्या ३५८४ रहेकोमा पुरुषको जनसंख्या १७०८ र महिलाको जनसंख्या १८७६ रहेको छ त्यसैगरी वडा नं. २ मा जम्मा जनसंख्या २५३६ रहेकोमा पुरुषको जनसंख्या १२३६ र महिलाको जनसंख्या १३०० रहेको छ । वडा नं. ३ मा कुल जनसंख्या ३४९० रहेकोमा पुरुषको जनसंख्या १६६१ र महिलाको जनसंख्या १८२९ रहेको छ । वडा नं. ४ मा कुल जनसंख्या १९९० रहेकोमा पुरुषको जनसंख्या ९५६ र महिलाको जनसंख्या १०३४ रहेको छ । वडा नं ५ मा कुल जनसंख्या २२६४ रहेकोमा पुरुषको जनसंख्या १०६१ र महिलाको जनसंख्या १२०३ रहको छ । त्यसै गरी वडा नं. ६ को कुल जनसंख्या २८०० रहेकोमा पुरुषको जनसंख्या १२९६ र महिलाको जनसंख्या १५०४ रहेको छ । औषत पारिवारिक आम्दानीमा कृषि व्यवसायको सबैभन्दा ठूलो हिस्सा रहेको छ र स्थानीय बासिन्दाको आम्दानीको अन्य स्रोतहरुमा व्यापार, नोकरी, उद्योग साथै वैदेशिक रोजगारी पनि हो । परम्परागत प्रणालीको कृषि ब्यवसायको विकल्प खोजिरहेका यहाँका बासिन्दा आधुनिक जीवनशैलीमा रमाउन थालेका छन् । स्थानीय जनशक्ति मजदुरी तथा अध्ययनका लागि विदेशिने क्रम क्रमशः बढिरहेको छ । यस गाउँपालिकामा आधारभूतदेखि माध्यमिक शिक्षासम्म प्रदान गर्ने शैक्षिक संस्थाहरु रहेका छन् भने उच्च शिक्षा विकासको पहल भैरहेको छ । यस गाउँपालिकामा सामुदायिक र संस्थागत गरी ६ वटा माध्यामिक तहका विद्यालय र २९ वटा आधारभूत तहका विद्यालय गरी जम्मा ३५ वटा शिक्षण संस्थाहरु संचालित छन् । विगत लामो
समयसम्म स्थानीय निकायमा जनप्रतिनिधिको अभाव, योजनावद्ध विकास कार्यक्रम कार्यान्वयनमा कठिनाई तथा आवश्यक आर्थिक व्यवस्थापनमा कठिनाई हुनुले यस गाउँपालिका क्षेत्रको अपेक्षित विकास हुन सकिरहेको देखिँदैन । तथापि विगत २ वर्ष पहिले भएको स्थानीय तहको निर्वाचन पश्चात् जनप्रतिनिधिहरुके बहाली भए सगंै विकास तथा सेवा प्रवाहमा जन अपेक्षाहरु सम्वोधन हुने र नागरिकका माग र आवश्यकताहरुको तत्काल सम्वोधन हुने सम्भावना बढेर गएको छ भने जनताका आशाका किरणहरु फैँलिदै गएका छन । विकासको लहर बढेर गएको छ । विभिन्न समुदाय, जातजातिका मानिसको बसोबास रहेको यस गाउँपालिकामा विभिन्न चाडपर्व मनाउने गरिन्छ । दशैँ, तिहार, माघी, होली, गौरा, कृष्णजन्माष्टमी, महाशिवरात्री, साउने र माघे संक्रान्ति, चैते दशै, बकर इद, बुद्ध जयन्ती आदि यहाँका चाडपर्व आफ्नो धर्म अनुसार मनाउने गरेको पाईन्छ ।